Schniba 2018

Juhee diä luschtigä Büezär sind daa

diä Büezär vo Wättischwiihiil.

Mir singed luut und däfüür falsch

ja daas isch eusä Schtiihiil.

Wänn irgendwo z‘Wädi en Seich passiert

wirds sicher vodä Büezär themaatiisiärt!

Dä Kutti wett ändli is Parlamänt

Für en Wättischwyler wär das rächt potänt.

D’Karrierä söll en Schritt vorwärts gaa

Doch d’Kathi wett ihre Sitz nöd verlaa

Drum übergang doch rasch dä stuuri Bock

Und nimm grad dä Doris ihre Hock!

Am Lucki vo Schönäberg nämed d’Lämpe dä Schnuuf

drum schlaat er siini Zält im Rüebliland uuf.

Das ewigä Gchäär hätter nümä mögä lose

drum treit er jetzt wiisi Sockä unter dä Hose.

Am Friedä im Schönäberg wär besser dient

wänn statt em Lucki dä Fiige giengt!

Dä Himmel über wädi isch gwöhndli stahlblau

vo dä Burgruiinä bis abe i d’Au.

Doch han ich letschti mit Schreckä gseeh

Vögel i dä Luft gseehsch fascht kei mee.

Die Drohnä säged’nä dä Luftkampf aa

zum Glück han ich mis Fangnetz daa!

Energiestadt das isch geschter gsii

hüt simmer ä «smart city».

En Zauberstab staht bim Martha’s Snacks zuä

im Fall dä Akku vom Prius laahmä tuet.

Doch eis Mannä säg ich Eu, passed uuf

Die Strahlä deet unä schaded Euem Schluuch!

Begrünti fläche muesmer immer Pfläge

Däm Ufwand sind eusi finanze erläge

Eis ums andär wie z'Paris

wird z Wädi betoniert Rabattäwiis

und s'Volk, das chunnt wie immer z churz

eusi Zääh sind duss nach em Velosturz

2.0 entsorgt au Wättischwyl glii

eusä Abfall söll doch au modern sii.

Dä Winterberg wird jetzt ziitgmäss gmacht

sodass er erstrahlt in neuer Pracht.

Aber wäg dem müend Ihr jetzt nöd verschreckä

Batteriä chann mer immerna im Karton versteckä!

Ja Lärm dä stöört, egal wo’d bisch

i dä Badi oder dihei am Zmittagstisch.

Als Wuetbürger muemmer sich das nöd büütä laa

und tuet gäge d’Gloggä und s’Horn voorgaa.

Mer fräged eus wie lang’s na so söll wiiter gaa

wänn mer jedä Zuäzuger tuet driischnurrä laa!?

Ziimetstern hani gern, Mailänderli au

Tirggel und Spitzbuuebä und Ringel z’Willisau.

Jedi Frau wett en Dokter als Maa

drum Purschtä loosed guuet.

Für dä Titel brucht’s nöd viel

nur chli Rhythmus im Bluuet.

Dynamischi Duos - s’eint gaat nöd ohni s’ ander

Wie dä Tell und siin Sohn, dä Walter.

Wänn mer d’Chöpf zämestreckt chammer viel erreichä

so stellt mer für d’Zuekunft viel schlaui Weichä.

Doch wänn d’ZVV und d’ZSG ziehnd a eim Strang

entstaaht nur en bieräweichä 5-Liiber-Zwang!

Ersch nach dä Pantarey isch dä Seeufer-Wäg choo

doch au chliini Wälle möged dem g’choo.

Nach churzer Zyyt wird bereits flissig saniert

nur stellt sich d’Fraag, wer daas finanziert.

S’dynamischä Duo hät ä supper Idee

vo jedem Fahrgascht wämmer en 5-Liiber mee

All vier Jahresziitä händ ihre Reiz

doch i dä 5. Hocksch z’Wädi innerä Beiz

Öb als Böögg, Samurai oder Bäär

verchleidät chunnt jedä guet dehäär.

Die Tradition söll wiiter fortbestaa

Dum chömäd uf d’Gassä zums luschtig haa!