Schniba 2026

Büezär Schniba jedes Jahr - mir werdert immer geiler

Jetz-simmer au na Tamboure - absoluuti Styler

Ewig s’glich Getrümmele - chasch nöd immer bringe

drum verwöhned mir jetzt eu - mit eusnä Engelsstimme!

Bim Blattmä da gönd d’Liechter uus – s’isch fertig prooduziert

was deet dä ganz Tag g’chüechlät wird - hät mich nie intressiert

Tankä-ade-mässi - zum Abschied tuen ich winkä

Hauptsach es höört ändli uuf - zum Ladä usä stinkäh

Dä Kutti git dä Stapi ab – er wott nüme amtierä

Vollziit heisst’s jetz Bundesbärn - prominänter profilierä

Immerhin faarsch sälber ab - bisch nani ganz verloorä

16 Jahr als Oberhaupt - maachäd suscht nur Diktatorä

Es wird gsuecht en Stappi - es git die grossi Sichtig

D’Kandidate tüend eso - als wääred’s huerä wichtig

Zurflueh, Büellmä, Wolfer - die Grinde muesch aaglotze

Bislin und au Erni - mir chunt da nur na s chotze

S’Kafi City isch verchauft - dä Martha’s tuet’s neu machä

Jetzt gitt’s eifach Büchsebier - ide FC Züüri Blachä

Mir Fasnächtler sind “gern “bereit - ä Chance am Bistro z’gää

En gratis Böögezmorge - wüür d’Hemmige eus nää

Schön bim Sträme Rietliau – chasch jetzt go sauniere

Füdliblutt id Pop-up Sauna – muesch di nöd geniere

En Sprung in chalte Zürisee – fühlsch di wiä im Himmel

Und ändli häsch ä Uusred – für din chliinä ….Pimmel!

Ganz fuul und ohni Zweck und Ziel, liit d’Ms Glärnisch träg dahi

Und jedes Jahr da heisst’s däzue, s’Schiff göchi uuf und bliibt glich zue -

es bliibt für immer zue

Es lächzt nach villne vollnä Lüt, doch uf dem Schiff da suufsch gar nüt

Und jedes Jahr da heisst’s däzue, s’Schiff göchi uuf und bliibt glich zue -

es bliibt für immer zue

Mer söts doch gar nöd quäle da, mer mueses jetzt vesuufe lah

Und i dem Jahr da heisst’s däzue, ich bohr es Loch und jetzt isch Rueh -

es bliibt für immer zuä

Z’Samstag’re am Morge früeh - muesch dä Sack iichlämme,

Durs Stägehuus wie dä Blitz - i d’Tüüfgaraasch tuesch ränne

Grochsend vor verschlossner Tüür - verzwiiflet zeersch am Chnopf

Beträtte seg verbottä diir gheit d’Decki uf dä Chopf

Bisch bsoffä nachem Usgang - oder eifach fuul

Mit’mä Trotti hei zuä flitzä - das isch huerä kuul!

Bisch däzuä na Egoischt - oder chübelblööd

Laa’s eifach im Gaggo staa - all anderä stöört’s ja nööd

Bisch du geistig obdachlos - nüt glernt und dumm gebore

En Spaghetti-Lismär - nur Luft zwüsched dä Ohrä

Au die gröschtä Döödlä - die finded all en Job

Fräg mal i dä Ochsäschüür - deet bisch du schnäll mal Top

Agnah du gaasch ufes Amt - wirsch kompetänt beraate

S' lauft däzue na speditiv - und muesch uf gar nüt warte

Die Vorstellig isch dank KI - scho ganz näch zum griffä

Dänk emal wie schöön das wäär - ä Ochsäschüür ohni Pfiffä

D’Schäggi isch i PÄNG-sion - isch vo dä Schroter gangä

Scho als chline Töfflibueb - hätt sie probiert, mich z’fangä

Damals haani us luuter Angst - dä Rännsatz abmontiert

Ab jetzt wird min alte Ciao - wieder ordentlich frisiert

Zäddel-Lisi, City-Förschter, Lang-Fing-Fang-Päng oder d’Schmier

Für d’Tschäggi gitt’s viel Begriff - wiit mee als nur die vier.

Doch jetzt bisch du PÄNG-sioniert - s’isch fertig kommandiert

Während dinnerä “Aktiivziit” - häsch s’Volch traumatisiert

Nachbärwschwiil “es grosses Fäscht” - singä, tanzä, suuffä

Wädi und Richti zämecho - erläbe ganz en Huufä

Richterschwiiler z’träffe - das hät gmacht mich gschiider

wieder eimaal huere froh - bin ich kein Turnliibler