MS Glärnisch

Refrain

Das aaltää Schiff heisst MS Glärnisch - es lottret vor sich hii

Dä Bug isch voll mit Wasser - anstatt mit guetem Wyy

Das Schiff heisst MS Glärnisch - es Wunder dass’ na staat

Es warted jedä Abig bis’s äntli unter gaat!

Strophe 1

Euses Schiff isch alt und hässlich - euses Schiff isch chalt und läär

Dänn scho länger als 5 Jaahar da bewirtet’s keinä mee.

Euses Schiff isch halb zerfallä und es knarrt und stöhnt und schreit

Eusem Schiff gaaht’s na vill schlimmer - na vill schlimmer als es schiint!

Strophe 2

Früehner hämmer deet na gschiiret - jedes Fäscht isch eskaliert

Und wännt’ hüt am Schiff verbiilaufsch dänn bisch nur na depprimiert

Dä Eigätümer isch ä Pfiffä - ja er isch en chrummä Lump

Zieh’ dä Anker - zieh dä Anker und gang mit diim Grümpel z’Grund!

Strophe 3

Daas Schiff isch voller Stimmä, wo kein Sterblichä verstaat

Daas Schiff isch voller Süüfzer, wänn dä Nachtwind umägaat

Daas Schiff hät vieli Tüürä und doch hätts kein Uusgang

Will wer drinn isch - ja wer drinn isch - dä isch gweiit am Untergang!

Strophe 4

Ja das Schiff das wämmer rettä, bevors na ganz undergaat

Will das Schiff isch voller Wunder und hett eigentlich Format.

Alli Sternä ghör ich singä und die Schattä am Chämi,

gleited zu dä Träum - ja zu dä Träum vo vergangnä Fäschter hii.