Schniba 2023

Juhee diä luschtigä Büezär sind daa -

diä Büezär vo Wättischwiihiil.

Mer händ scho gmeint es gäb kei SchniBa mee -

drum freuemer eus, Eu ändli wieder z’gsee!

Wänn irgendwo z‘Wädi en Seich passiert -

wirds sicher vodä Büezär themaatiisiärt!

Es Rissli deet, es Rissli daa -

über d’Passerellä chasch nöd sicher gaa.

Scho s’zweit Mal muemmer sie jetzt flickä -

dasses d’Lüüt nöd tuet uf d’Gleis abäzwickä.

Mer chönnt meinä sone Brugg wär für’s Bouamt kei Sach -

bide Fiirtig wird s’Brüggli susch au immer gmacht!

Dass vorem Sträme kein Tschalpi wird vercharret -

hätt d’Stadt kei Choschtä und Müeh iigsparet.

Dä gääli Strich bringt d’Lüt zum Haar raufe -

häsch en knappä Meter Platz zum fürälaufe.

Erheiterä diis Gmüet, wänn das dich macht suur -

mit dä uufgsprayte Pimmel vo Bodä und Muur!

Was händ s’Frohmatt und d’Fifa gemein -

korrupti Cheffä imene Altersheim.

Bi Beidne werdet sich d Täsche gfüllt -

und dänn sich gern in Unschuld ghüllt.

Überall macht mer nur na die hohl Hand -

Drum gitt’s die rot Charte und tschau mitenand.

Es Blauliecht deet es Blauliecht da -

i dä Au wett mer über Cholä gaa.

Mit heissä Sohlä ischs Befindä nöd toll -

am Fakir isch’s gliich - siis Konto isch voll.

Dä verloorni Stutz isch glii «lang wie breit» -

Brandnarbe hingäge hebäd für d’Ewigkeit!

Dä Tagi macht en Bildigsevent -

dass Füür heiss isch, das hät mer verpennt.

D’Reporter tüend sich bim Fürlauf sehr schwer -

Ihri Fuesssohlä sind jetzt drum medium rare.

Drum staht dänn im Tagblatt uf Siitä 1 -

Achtung! Achtung! – Gluesä sind heiss.

Dä Schuelwäg isch immer es Abentüür -

doch gaht er z’lang, isch’s dä Elterä nöd ghüür.

Dänn secklet mer schnäll vor s’Verwaltigsgricht -

und klagt, dass eim das gar nöd entspricht.

En Awalt isch tüür, das isch ebäfalls doof -

chauf doch gschiider es Velo diim Goof.

In Luxäburg gaht Wädi steil -

Energiestadt Gold – miir sind so geil!

Mer empfangt es Priisli und gitt mächtig aa -

dä Jonas grinst fröhlich id Kamera.

Aber Joni wie wär’s mit däm Luxemburg Trick -

importier statt Pokäl lieber d’Stüürpolitik.

Wettsch im Winterberg obä din Güsel looshaa -

muesch zersch mal innerä Schlange astaa.

Mitemä Schnägg söll die Schlangä jetzt verschwindä -

die Idee entspringt eusnä schläuschtä Grindä.

Für jedä chlii Seich muesch z’Wädi fäng tuggä -

läcked miir doch am verlängretä Ruggä!

Wänn z’Wädi mal eis am Tirggel wotsch ha -

staasch meischtens mit trockner Schnurrä daa.

Jedi Beiz isch gschlosse das isch doch en Hohn -

häsch s’Gfühl es herrschi d’Prohibition.

Höred doch uuf und mached chli Meis -

ufe mit dä Chrüeg jetzt suufemer eis!

All vier Jahresziitä händ ihre Reiz

doch i dä 5. hocksch z’Wädi innerä Beiz.

Öb als Schnägg, Fakir oder Seebäär -

verchleidät chunnt jeedä guet dehäär.

Die Traadition söll wiiter fortbeschtaa -

drum chömäd uf d’Gassä zum’s luschtig haa!

Dä Schandfläck am Seeplatz isch schnäll erkannt -

er isch als MS Glärnisch bekannt.

Sitt Jahr und Tag tuet mer Lösigä suechä -

mer wird sich nöd einig und tuet numä fluechä.

Es isch nüme z’rette, drum holed doch d’Werch -

ab mit dem Siech Richtig Winterberg!