Schniba 2019


Juhee diä luschtigä Büezär sind daa

diä Büezär vo Wättischwiihiil.

Mir singed luut und däfüür falsch

ja daas isch eusä Schtiihiil.

Wänn irgendwo z‘Wädi en Seich passiert

wirds sicher vodä Büezär themaatiisiärt!

Am Seeplatz hät’s das Jahr d’Iisbahn nöd gää

kei Cholle, kei Lüüt, die schwirigi Laag am See.

Dä Gipfel - s‘Ok schüüsst voll drii

Turnliiblär sölläds mache, daas chas doch nöd sii.

Mir hoffäd sie gahat dä Herbscht widär uuf

zum warte uf d’Seegfröörni fäält eus dä Schnuuf!

Laufsch z’Wäädi im Zentrum her und hii

häsch s’Gfüül chönntsch au innerä Geisterstadt sii.

Egaal wod anäluägsch, d’Läde stönd läär

Exlibris, Musig Huuser oder Schportlade vom Bäär.

Ich freu mich scho jetzt uf d’Eröffnigsaläss

vo dä coiffeurläde Nummer 17 bis 60.

Au d Beizäsituatioon laht eus kei Ruä

es sind huerä wenig und meischtens zuä.

Und wänn’d mal z Wädi is Reschti gaasch

muesch Thailändisch chöne, susch wirds ä Blamaasch.

Mit vill meh Beize wäärs huere glatt

vo Curry und Fischzüügs wirsch eh nöd satt!

Kriminelli Bandä häts immer scho gää

jetzt muesch di au i dä Badi in Acht nää.

Äs neus Kartell verbreitet Angscht und Schreckä

sogar dä Badmeischter muess sich versteckä.

I dä Brättlibadi häsch du kei Platz

vo dä Chrampfaderemafia gitts eis an Latz!

Heiss ischs im Land, all sind am Motze

dä Badmeischter isch gröber am Chotze.

Ziit fählt dass dä Jonas e Lösig suecht

siin Kaländer isch - mit Aperos überbuecht.

Ohni Ufsicht ide Badi wärs cheibe glatt

im beschte Fall suffed die Wiiber ab!

Letscht Jahr hämmer eusi Gränze usgwiitet

nach eim Jahr isch entli fertig gschtriität.

Dänn hätts es fiises Manööver gää

d‘Schwyzer sind choo - händ euises Land welle nää.

Wännd Schwyzer undbedingt uf Wäädi wänd gaa

chönds z’Schönäberg am Meier siis Grundstück haa!

S’letscht Jahr händs eus d’Rabattä gnaa

d’Zerbrastreifä sind daas Jahr draa.

Wättischwyl isch jetz es Raserparadies 

Gad obä im Fäld isch d’Situation extreem miis.

Dä Fäldbeck chan nöd andersch mit ganz vill schnuf

macht er hinterem Lade en Friidhoof uuf!

Nach de Ferie im Summer sind d‘Lehrer ufgschmissä

sie tüend ihri ganze Daatä vermisse.

Bits und Bytes cha d‘Stadt nöd verwalte

d‘Lehrer müend all ihri Blettär neui gstalte.

D’Alexia im Stadthuus frögt sich schockiert

wäär das ächt am Zollinger au passiert?!

All vier Jahresziitä händ ihre Reiz

doch i dä 5. hocksch z’Wädi innerä Beiz.

Öb als Böögg, Samurai oder Bäär

verchleidät chunnt jeedä guet dehäär.

Die Traadition söll wiiter fortbeschtaa

dum chömäd uf d’Gassä zums luschtig haa!

Bide Rääbe chunnt ä Antänne ufs Dach

d’Bewohner findet daas huuerä Schwach.

Die Straalä tüend am Hirni nöd guät

au i dä Pfiifä fählt eim dänn s’Bluät.

Dä Heini vom Stadthuus seit tüend nöd so blööd

I eusem alter vöglet mer nööd!


Diese Webseite verwendet Cookies. Durch die weitere Nutzung stimmen Sie der Verwendung von Cookies zu.
Einverstanden