Schniba 2025

Über d MS Glärnisch - müemer jedes Jahr schnurre

Ja Gopferammi huere Siech - das Thema isch doch durre

Staht das Schiff na nöchst Jahr det - ihr chönds eu ja dänke

Dänn gömmer dä huere Göppel - all zäme go versänke

Am Seeplatz wird jetzt spanisch gschnurrt - wägem Peru Resti

S Fischzüg und au d Meersäuli - seged det nur s Besti

Leider weisses niemert gnau, det häts na nie Lüt gha

Danke vilmal Tannerli - häsch d Bar am See eus wäggnah

Dä Lift Am Bahnhof Wädischwil - dä isch also schön blöd

Funktioniert nur langsam und meistens überhaupt nöd

Doch verpassisch dänn din Zug - tuets der vill erspare

Muesch dänn nöd bi Richti oder Horge durefahre

Vom Seeplatz bis zum Giesse– wot mer en Stäg baue

Doch die Choste tüend eim - us dä Socke haue

18 Millionä - das isch ganz vill Sold

Ich glaub die baueds Brüggli - grad us puurem Gold

Ich han ä klari Meinig - losed zue, jetzt brichti

wänder en Stääg uuftue - für Mänschä uus Richti?!

Machemers doch wie dä Trump - das wühr mir na gfalle

Ufem Steg da gits e Muur - und Richti mues si zalle

Räge Räge tröpfli es rägnet uf mis chöpfli

Am Arx en Ciel wirds chöpfli nass doch s Kiffe macht mir trotzdem Spass

Am Arx en Ciel wirds chöpfli nass doch s Kiffe macht mir Spass

Räge Räge tröpfli es rägnet uf mis chöpfli

Eusi Kasse isch ganz Leer - es Crowdfunding das mues deher

Eusi Kasse isch ganz Leer - es Crowdfunding mues her

Räge Räge tröpfli es rägnet uf mis chöpfli

D Bank seit mir chönd d Batze ha - jetzt lüti grad mim Dealer a

D Bank seit mir chönd d Batze ha - am Dealer lüti a

Mit Gäld da chum ich super drus - mis Konto isch randvolle

Drum bin ich in PaBa Märt go Wädin Taler hole

Ich han träumt vom schnällä Gäld - han dänkt es lauft wie gschmiert

Doch hettti gschider dä Chlütter - id CS investiert

Euse schöne Wädiberg - wot mer grad verschandle

Wertvolls Kulturland ine Deponie verwandle

Dä einzig Huufe wo au ich -- det obe na wühr gesehe

Währ einzig e Deponie für politischi Schissidee

Und gits halt kei Deponie - tuet mer Windchraft baue

Die tüend statt em Bode - eim nur d Sicht versaue

Nämed doch die Redli - und stelled sie ums Stadtamt

Det häts so vill heissi Luft - dänn trülled die grad konstant

E Wurst es Bier en halbe Aff - mer vergisst scho fast dä Schade

Fasnacht ide Chille und es bröckled obe abe

Wäge bizli Dachschade - dä Herrgott mues nöd grolle

Immerhin - eimal im Jahr - isch sini Chille vollä

Baugespann häsch in Wädischwil - dSkyline isch am riife

Jede heimisch Architäkt - bechunt da grad en Stiife

Mir verlanged gar nöd vill - vo eu Planigsglöön

Aber macheds usnahmswis - eifach es birebizli schön

Inglisch is in Wädenswyl - die neui Sprach to bii

Ich schnurr lieber Züritütsch das Änglisch mues nöd si

Simmer doch mal ehrlich - mir isches nöd ghür

Frögt mich eine uf dä Strass - where is the Oxenschüür