Schniba 2020


Juhee diä luschtigä Büezär sind daa

diä Büezär vo Wättischwiihiil.

Händ singä güebt, doch bises guet töönt,

ja da bruuchts scho na sehr viel.

Wänn irgendwo z‘Wädi en Seich passiert

wirds sicher vodä Büezär themaatiisiärt!

Dä Kaya Yannar isch jetz z Wädi dihei

Papparazzi finded das huerä geil!

Überall staahts drinn, keini chas la bliibä

im Chääsblatt vom Chääli müends au drüber schriibä.

En türkischä Promi find ich gar kein Mischt

hauptsach dä Erdogan bliibt wonner isch.

Gopfertammi, ich glaubs ja nööd

chuum fusioniert scho tüend d Berglär blööd!

Sie ärgeret sich fest, wills kein Polizist dörfed ha

Und lüütet wäg jedem Scheiss, eusne aa.

Wänner Beamti bi eu wänd, und das au nöd zknapp

Dänn chnöpfed dä Äuler doch s Gymi ab!

Wänns luut isch im Glärnisch weisch eis ganz genau

sisch entweder SchniBa oder Wädibräu GeeVauu.

«Erfolgsbrauerei» nänned Ihr Eu arrogant

Däbii sinder wiit umä als Pleitegeier bekannt.

Wänner wiiter wänd bestaa, tüends doch soo probierä

statt d’Aktionääre, d’Chöschtä reduzierä.

S Resti isch voll doch d Kasse isch leer

wänd mich frögsch isch das doch cheibe schwer

Immer wider tuet mer neui Bier kreiere

Doch schinbar tuet das, überhaupt nöd rendiere

Miir müend öppis mache, anstatt sich zbeklage

und die Ganz huere Gschäftsleiig zur Stadt use jage!

Dä Rase vo YB wird ide Beichle verleit

Mer hofft das meisterhafte sich, uf d Spiller übertreit.

Doch statt Fallrückzieher und Absatztrick

Gits wie scho sit Jahre dä glich Grottekick.

Uf dem schöönä Rasä sött mer sie nöd länger tschuute laa

Söll doch am Canepa siin Hund druff Gassi gaa.

Dä Stapi macht Wahlkampf, das merksch sehr gschwind -

öb online oder nöd, überall gseehsch siin Grind!

Statt allnä uf Social media naazspionierä -

Wüürsch besser Diin Namä richtig buechstabierä.


Dä Grüen tuesch spielä zum Wähler mobilisierä -

däbii gaats Diir nur drum richtig abzkassierä.

Badi statt Bali isch das was Du seisch -

Bisch wiedergwählt - höör uuf mit dem Scheiss!

Über dä Au-Park hät mer vill diskutiert

En breite Widerstand hät sich formiert.

D Hüüser sind zhöch mer gseht chum dä See

Und d Halbinsle au nöd, das tuet scho fest weh.

Schlimmer tüpfts Horge, drum tüend nöd so blöd

Die gsehnd wäg dä Au s schöne Wädischwil nöd.

All vier Jahresziitä händ ihre Reiz

Doch i dä 5. Hocksch zwädi innerä Beiz.

Öb als Böögg Samurai oder Bäär

Verchleidet chunnt jedä guet dehäär.

Dä Bruuch söll wiiter fortbestaa

Drum chömed ufd Gasse zums luschtig haa!

In Wädi wird gredet über Mobilfunk 5G

Die meiste bechömed vom Wort scho Chopfweh.

D Strahle lönd d Hirnleischtig verblasse

Dä IQ so tüüf, wie eusi Stadtkasse.

Alles Hirnlosi z Wädi, das wäär mir nöd ghür

Viell z’vill Kandidate fürd Ochseschüür!

Gross Werbig i dä Stadt fürs Begägnigsfäscht

En Alass wo sich sicher jedä wegtätscht.

Doch deet hocked nur es paar Knilchä ume

Dä ganz Mob isch am See, bide Tankstell une.

Wänn dä Kutti gwüsst het, das mer sis Fäscht so versetzt

Währ s Seegüelti hützutags immer na bsetzt!


Diese Webseite verwendet Cookies. Durch die weitere Nutzung stimmen Sie der Verwendung von Cookies zu.
Einverstanden